Жамбыл облыстық соты
Баспаға арналған нұсқасыРүстем Алшынбаев, облыстық соттың төрағасы:
«Сот билігі – мемлекеттік саяси жүйенің құрамдас бөлігі, ажырамас бөлшегі»
Мемлекеттің өркениетті және жүйелі дамуы сол елдің Ата заңы – Конституциясына тікелей байланысты. Конституция мемлекеттің геосаяси орналасуына, этносаяси құрамына, қалыптасқан мәдениеті мен дәстүріне, экономикалық ерекшеліктеріне сай болуы керек. Біздің еліміз де тәуелсіздіктің алғашқы жылдарында өз Ата заңын қабылдап, басты заңының аясында дамуы мен өркендеуінің заңдық негізін бекітті. Содан бері арада жиырма жыл өтті. Уақыт үдерісі мен замана талабына сай 1998 және 2007 жылдары еліміздің Конституциясына бірқатар өзгерістер мен толықтырулар енгізілді. Сол өзгерістерде еліміздің сот жүйесін жетілдіру мәселесіне де баса мән берілді. Бұл үдерістерге деген қажеттілік неден туындады? Облыстық соттың төрағасы Рүстем Алшынбаевпен әңгімеміздің әлқиссасы осы сауалдан басталды. -Тәуелсіздігіміздің алғашқы жылдарында ел алдында мемлекеттік және қоғамдық құрылыстың сипатын мүлде басқа арнаға бұру міндеті тұрды. Басқару мен билік жүйесін белгілеу керек болды. Ол үшін құқықтық жүйені қалыптастыратын еліміздің негізгі заңын қабылдау қажет еді. Президент Н.Ә.Назарбаев еліміздің конституциялық дамуына қатысты сол кезеңде: «Жалпы таным тәжірибесі және соның ішінде Қазақстанның мемлекеттік-құқықтық дамуы елдің конституциялық қалыптасу тарихынсыз жаңа тәуелсіз мемлекеттің конституционализм теориясы да болмайтындығын үйретеді» деп жазды. 1995 жылы қабылданған Конституция – тұңғыш рет бүкілхалықтық талқылауға түскен тәуелсіз еліміздің тарихындағы бірінші құжат. Онда 1-бабының 2-тармағында республика қызметінің түбегейлі принциптері: қоғамдық татулық пен саяси тұрақтылық, бүкіл халықтың игілігін көздейтін экономикалық даму, қазақстандық патриотизм, мемлекет өмірінің аса маңызды мәселелерін демократиялық әдістермен, оның ішінде республикалық референдумда немесе Парламентте дауыс беру арқылы шешіледі деп көрсетілген.
1998 жылғы 7 қазанда Қазақстан Конституциясына өзгерістер мен толықтырулар енгізілді. Жаңа өзгерістер мен толықтырулар – қос палата қызметінің мерзімі, депутаттардың сайлануы, Үкімет мүшелерінің құзыреті шегінде анағұрлым кең дербестік беру, әкімдерді сайлау тәртібін бекіту мәселелеріне қатысты. Уақыт өте келе қазақстандық қоғамның дамуы мен мемлекеттің жаңа жағдайдағы негізгі қырларын айқындау мақсатында халықаралық тәжірибеге сүйенген конституциялық реформа жүргізу керек болды. Бұл – Президенттік басқарудан демократиялық сипаты басымырақ парламенттік жүйеге өту кезеңі еді. Конституцияға енгізілетін өзгерістер мен толықтырулар негізінен билік тармақтарының арасындағы тепе-теңдік және тежемеліліктің тиімді жүйесін қалыптастыруға бағытталуы тиіс-тін. Осындай түбегейлі құқықтық өзгерістердің қажеттілігін ескере отырып, Парламенттің қос палатасы Президент Н.Ә.Назарбаевтың Конституцияға өзгерістер енгізу туралы ұсынысын қолдап дауыс беріп, 2007 жылғы 21 мамырда арнайы заң қабылданды.
Конституциямызға енгізілген демократиялық өзгерістер арқылы бірқатар билік уәкілеттігі Парламентке өтті, яғни құзыреттік міндеттер қайта бөлінді. Осылайша, Парламенттің рөлі күшейіп, мемлекеттік басқаруға жаңа үлгі – президенттік-парламенттік басқару жүйесі негізделе бастады. Конституцияға енгізілген өзгерістер саяси тұрақтылық, ұлтаралық татулықты нығайтуға бағыттала отырып, сот жүйесін жетілдіру, судьялардың мәртебісін көтеру сынды жаңа реформаларға да негізделді. Ата заңымыздың жетінші бөлімі «Соттар және сот төрелігі» деп аталады. Сол бөлімнің жетпіс жетінші бабында «Судья сот төрелігін іске асыру кезінде тәуелсіз және Конституция мен заңға ғана бағынады» делінген. Осы мысалға келтіріп отырған бір ғана сөздің өзі бізге үлкен жауапкершілік жүктейді. Ата заңымыздың еліміздің сот жүйесін жетілдірудегі маңызын айқындай түседі. Өйткені, сот жүйесінің даму жолдарын мемлекеттің даму жолдарынан бөлек, ажыратып алып, бағалау мүмкін емес. Сот билігі – мемлекеттік саяси жүйенің құрамдас бөлігі, ажырамас бөлшегі. Еліміз егемендік алып, тәуелсіздікке қол жеткен алғашқы жылдардан бастап сот жүйесі қоғамдық заңдылықтарға негізделген іздену, қалыптасу, даму жолдарынан өтті. Өткен жылдар ішінде отандық сот жүйесін жалпы танылған стандарттар мен талаптарға жауап беретін жаңа деңгейге көтеруге ықпал еткен тұжырымды құжаттар мен құқықтық актілер дайындалды. Алқа билер мен ювеналдық, әкімшілік, мамандандырылған экономикалық соттарды құруға, қамауға соттардың санкция беруіне және соттардың қызметін қамтамасыз ету мен олардың шешімдерін орындауға байланысты бірқатар заң актілері дайындалып, тәжірибеге енгізілді. Соттардың құқық қолдану тәжірибесінде кездесетін өміршең мәселелер бойынша Жоғарғы Соттың бірқатар нормативтік қаулылары қабылданды. Сот құрылымы мен сот өндірісінде түбегейлі өзгерістер жүзеге асырылып, судьялардың мәртебесі мен соттардың тәуелсіздігі нығая түсті. Тәуелсіздік алған жылдар аясында Қазақстан судьяларының алты съезі өтіп, әрбір съезде республика сот жүйесінің бүгіні және болашағы туралы өзекті мәселелер талқыланып, мемлекеттік маңызы бар шешімдер қабылданды дей аламыз. Біздің адал еңбегіміз қоғамға өте қажет, біздің еңбегіміздің нәтижесі болашақ жаңғыруымыздың, кемелденуіміздің кепілі. Заң талаптары сақталған жерде тәртіп болады, ал тәртіп болған жерде еңбектің жемісі мол болары даусыз.
- Өзіңіз айтқандай, сіздердің еңбекетріңіздің нәтижесі болашақ жаңғыруымыздың, кемелденуіміздің кепілі. Осыдан болса керек, Елбасымыз 100 нақты қадаммен өлшенген бес халықтың реформаның екінші реформасында заңның үстемдігін қамтамасыз етуге баса көңіл бөлу қажеттігін атап көрсетті. Осыған орай, еліміздің сот жүйесіндегі реформаны жетілдіру қажеттігін айтқаны белгілі. Мемлекет басшысының айтуынша, судьялар жабық корпорацияға айналмауы тиiс керiсiнше, қоғамға ашық болуы керек. Бұл ретте Елбасы ашық болу мәселесін судьялар қатарындағы коррупцияға қарсы дәрімен теңеді. Жалпы судьялардың ашықтығы халықтың сот ісіне деген сенімін де еселей түсетіні анық. Осы жайында не айтасыз?
- Елбасы сайлауалды бағдарламасы ретінде бес халықтық реформаны жария еткені белгілі. Осы бес халықтық реформаның екіншісі заңның үстемдігі мен меншік құқығының қорғалуын қамтамасыз етуге бағытталған. Бұл орайда Елбасы «Бүгінде сот жүйесінің әлсіз буыны – судьяларды іріктеу, оларға қойылатын біліктілік талаптарының тиімсіздігі, судьялар корпусының жемқорлыққа баруы. Бізде заңгерлер, тіпті, сот процестеріне қатысу тәжірибесінсіз-ақ судья бола алады. Бұл кейде судьялар корпусында біліктілігі төмен мамандардың пайда болуына әкеліп соғады. Судьялар тарс жабық корпорация болмауға, судьялар қатарындағы жемқорлықтың емі болып табылатын қоғамдық сыннан тыс қалмауға тиіс» деп атап көрсете отырып, сот жүйесіне жаңа міндеттер қойды. Президент судьяларға біліктілік талаптарын қатайту керектігін тапсырды. «Судьялар корпусындағы орыннан үміткер нотариусте, ІІМ-де, полицияда немесе заңгерлер дайындайтын ЖОО-да емес, кемінде 5 жыл сот жүйесінде атқарған жұмыс өтіліне ие болуы тиіс. Кандидаттар жұмысынан босатылған негізде және бір жылдан кем емес мерзімде соттардағы сот тағылымдамасы үшін шарт ретінде қатаң тестілік іріктеуден өтуі тиіс. Кез-келген жоғары тұрған судья төмен деңгейдегі соттарда жұмыс істеуден өтуге тиіс. Сондай-ақ, жұмысын енді бастаған судьялар үшін кем дегенде бір жыл сынақ мерзімін енгізген маңызды, ол одан табысты өткеннен кейін тұрақты судьялыққа тағайындала алады» деді Президент Н.Назарбаев.
Заңдар азаматтық қоғамдағы басты құндылықтарды қалыптастырушы бірден-бір абсолютті маңызды сипатқа ие күш болуы тиіс. Осы екінші реформаның мазмұнына сот жүйесін жетілдіру, полицияның қоғамның сеніміне ие болатындай дәрежеде жұмыс жасауына қол жеткізу елдің әділ заңға деген сенімін арттыру енеді. Мұның ең басты артықшылығы әлеуметтік әділетсіздіктерге жол бермеу екендігін айтып өткім келеді. Демократиялық қоғамдағы ең басты құндылық адамның құқығы мен еркіндігі болса, оны жүзеге асырушы бірден-бір тетік – осы әділ заң мен құқық сақшылары. Сондықтан да бұл реформаның еліміздің әрбір азаматына берері мол. Мұның еліміздегі құқықтың мәдениетті, құқықтық сананы дамыған мемлекеттердегідей дәрежеге көтеріп, елімізді әрі қарай демократияландыра түсудегі маңызы зор дер едім. Құқықтық мемлекетте адам заңға сенуі тиіс. Сондықтан заңдардың үстемдігінің артуы – адам құқықтарының негізгі орынға шығуы деген сөз. Айту керек, сот жүйесі мен құқық қорғау органдарының жұмысын жаңғырту жөніндегі тиімді іс-қимылға 19 қадам арналып отыр. Олардың қатарында азаматтардың сот төрелігіне қолжетімділігін жеңілдету үшін сот жүйесі инстанцияларын оңтайландыру, бес сатылы сот жүйесінен үш сатылы сот төрелігі жүйесіне көшу, судьялардың есеп беру тәртібін күшейту, алқа билер соты қолданылатын салаларды кеңейту сияқты маңызды міндеттер бар.
Түптеп келгенде, мұның бәрі халық үшін атқарылып жатқан шаруалар екені бесенеден белгілі. Өйткені, мемлекеттің басты байлығы – халық. Азаматтардың мүдделері қандай жағдайда болсын мемлекеттің назарынан тыс қалмауы тиіс.
-Облыстық сот биыл қанша іс қарады? Ашықтық мәселесі сол процестерде қаншалықты сақталды?
- Бірінші жарты жылдықтағы қорытынды бойынша сот өндірісіне 16 977 азаматтық іс қаралып, оның 10 982 ісіне қаулы шығарылды. Ал өткен жылдың осы уақытында соттармен 14 803 азаматтық іс қаралып, оның 10 275 ісіне қаулы шыққан. Осы келтірілген мәліметтерді сараласақ, азаматтық істер санының өскенін байқаймыз. Жылдың басынан облыс соттарымен 8784 әкімшілік іс қаралды. Өткен жылдың осы уақытында бұл көрсеткіш 9085 істі құраған болатын. Сонымен қатар осы жылдың бірінші жарты жылдығында облыс соттарымен 894 тұлғаға қатысты 798 қылмыстық іс қаралды. Қаралған істің барлығында ашықтық мәселесі барынша сақталды деп айта аламыз.
- Елбасы алдағы уақытта судьялардың біліктілігіне де баса мән берілетіндігін айтты. Бұл тұрғыда судьялыққа үміткерлердің жеке басының қасиеттері қалай бағаланбақ?
-Жұмыс бабында судьялар түрлі қиын қақтығыс оқиғаларға тап болуы мүмкін, сондықтан судьяларға біліктілік емтиханмен қатар психилогиялық тестілеуден өтуі міндеттілуі керек. Аталған тесттен өту (маман психологтардың қатысуымен) болашақ судьялардың психологиялық төзімділігін, адамдармен қарым-қатынас жасау, іске қатысушыларды ұстамдылықпен тыңдау және тәртіптілігін тексеруге мүмкіндік береді. Бұл нақты тұлғаның сот саласындағы әлеуеттік сыйымдылығы мен мүмкіндіктерін анықтауға, үміткерлердің жеке басына қатысты оң мәліметтерді анықтау, үміткерлердің арасынан психологиялық тұрақсызды немесе психикалық жай-күйіне әсер ететін түрлі наркотикалық құралдарды пайдаланатын теріс ойлы тұлғаларды анықтауға жол береді.
Психологиялық қасиеттермен қатар судьялыққа үміткерлердің моральдық қасиеттері мәселесі де маңызды болып табылады.Былтырғы жылдың қараша айында ҚР «Қазақстан Республикасының сот жүйесі мен судьяларының мәртебесі туралы» Конституциялық заңына өзгертулер мен толықтырулар енгізілді. Судьялыққа үміткерлердің моральдық қасиеттеріне қатысты облыстық соттарда Қоғамдық кеңестер құрылды.
Мұндай, судьялыққа үміткерлерді іріктеу тәжірибесі облыстық сотта 2012 жылдан қалыптастырылған. Қазақстан Республикасы Судьялар Одағының Жамбыл облыстық филиалы жанынан құрылған Қоғамдық кеңес азаматтар мен судьялар корпусының өзара байланысын қамтамасыз етуге ықпал еткен.
-Жуырда ғана еліміздің Парламенті судьяларды өмірлік қамтамасыз ету туралы заң жобасын мақұлдады. Бұл заң судьяларды ең жауапты қызметте, сот төрелегін айтуда барынша шыншыл, әділ әрі адал болуға шабыттандырады. Осы заңға қатысты қандай пікір айтасыз?
-Конституциялық заңның бұл жобасы судьялардың зейнетақысын қамтамасыз ету институтының қайтақұрылымдауы жолымен отставкадағы судьяларды ай сайын өмірлік қамтамасыз етуді енгізуді қарастырады. Заң жобасы отставкадағы, 15 жылдан кем емес судьялық өтілі бар және зейнет жасына жеткен судьяларға заңмен бекітілген өмірлік қамтамасыз етуді қарастырады. Бұл төлемдерден салық ұсталмайды. Бұл жауапты әрі қиын жұмысты 15 жылдан аса уақыт бойы абыроймен атқарған судьяларға көрсетіліп отырған мемлекеттің тарапынан құрмет пен қамқорлық. Бір ескеретін жайт өмірлік қамтамасыз ету барлық судьяларға берілмейді, тек еңбек сіңіріп отставкаға шыққандарға. Бұл заң судьяларды ең жауапты қызметте, сот төрелегін айтуда барынша шыншыл, әділ әрі адал болуға шабыттандырады. Елбасымыз Қазақстан халқы Ассамблеясы сессиясындағы өз сөзінде «әділ мемлекеттік аппарат, әділ сот болғанда нағыз біртұтас ұлт қалыптасатынын» атап өтті. Сонымен қатар, сот жүйесін дамытудың бағыт-бағдарын тағы да айқындап берді. «Барлық судьялар, құқық қорғау органдары тек Конституцияға, Заңдарға бағынуы тиіс. Адам өзінің құқын, міндеттері мен мүмкіншіліктерін сотта қорғауы керек. Сот әділ, жемқорлыққа бой алдырмаған, жақсы жалақы алатын, қатаң жазалайтын болуы қажет», – деген Елбасы сөзін біздер, сот саласының қызметкерлері, судьялар корпусы жадымызда ұстап, табандылықпен іске асыруға тиіспіз.
-Сот залдарының техникалық құрал-жабдықтармен қамтамасыз етілуі қалай?
-Сот залдарын қажетті құрал-жабдықтармен қамтамасыз ету сот процесінде айрықша рөл атқарады. Бұл бағыттағы жұмыстар облыста 2011 жылдан бастап мықтап қолға алынған. Бүгінде облыстағы 61 сот залының аудио-видео аппараттармен жабдықталған 37 залында тоғыз мыңнан астам сот процесі жүрді. Алдағы уақытта сот залдарын техникамен қамтамасыз ету жұмыстары жалғасып, барлық сот залдары жүз пайыз сапалы аппараттармен қамтамасыз етілетін болады.
-Қазір әділдік іздеген адам көп. Олар алдымен әділ соттан шынайы төрелік күтеді. Осы орайда сот жүйесіне азаматтардың сенімін арттыру мәселесі жайлы айтсаңыз.
-Соңғы жылдары Қазақстанның сот жүйесімен азаматтардың сенімін арттыруда және соттардың жұмыс сапасының қанағаттандыруы барысында үлкен жұмыс атқарылуда. Атқарылып жатқан жұмыс өзінің оң нәтижесін беруде, бұған дәлел сот кеңістігіне түскен азаматтардан тәуелсіз социологиялық сұраныстың қорытындысы. Азаматтардың сот жұмысының сапасына қанағаттануы мен сенім білдіру дәрежесін анықтау үшін БҰҰДБ-ы Құқықтық саяси зертеу орталығымен бірігіп Қоғамдық ойды зерттеу орталығы 2015 жылдың ақпаны мен мамыр айына дейінгі аралықта 193 аудандық және оған теңестірілген Республикалық соттарда сот істеріне қатысушылардан сауалнама жүргізген. Сауалнама қорытындысы бойынша жалпы соттардың жұмысына қанағаттану дәрежесі пайыздық есеппен сауалнама алынғандардың 71,3 пайызын құрапты. Сауалнама авторларының мәліметі бойынша, жалпы азаматтар сот қызметін жоғары бағалады, яғни олар соттың қолжетімділігі мен ақпараттың мазмұндылығымен, тілдегі ақпараттың қолжетімділігі мен қызметі, сот отырысының өтетін уақыты мен орны туралы уақытылы хабарлануы, сонымен қатар кеңсе қызметкерлерінің сыпайылығы мен құзыреттілігі сапасына жоғары баға берді. Сот жүйесінің ашықтығы жоғары дәрежеге жеткізілуі, азаматтардың әділет органдарына сенімін арттырды. Бұл өз кезегінде біздің де жұмысымызға соны серпін берді.
-Әңгімеңізге рахмет!
Сұхбаттасқан Фариза Әбдікерімова, «Ақ жол».
