Кісі өлтіруге оқталғаны үшін 15 жылға сотталды

Жамбыл облысы бойынша қылмыстық істер жөніндегі мамандандырылған ауданаралық сотында Қазақстан Республикасы Қылмыстық Кодексінің (ары қарай ҚР ҚК-нің) 24-бабының 3-бөлігі - 99-бабының 2-бөлігінің 1 тармағымен  (адам өлтіруге оқталу), айыпталып сотқа берілген А-ға қатысты қылмыстық ісі қаралып аяқталды.

Істің құжаттарына сәйкес, 30 мамыр 2017 жылы шамамен 11:00 сағатта, сотталушы А., алкогольды мас күйінде өзінің ата-енесінің үйіне келген. Осы үйде А.  мен жұбайы М.-ң арасында ұрыс болып, аяғында жұбайы М. бөлмеге кіріп кетеді. Сол кезде А. жұбайы М.-ға қасақана қаза келтіру қылмыстық ойы туындап, стол үстінде тұрған ас пышағымен қаруланып, оның артынан бөлмеге кіріп, қолындағы ас пышағымен жұбайы М.-ң оң жақ бүйірі тұсынан соққы салған.

Содан А. өзінің қылмыстық ойын аяғына дейін жеткізу мақсатында денесінің әр жерінен пышақпен соққы келтірген. Осы кезде қызы М.-ң жан дауысымен айқайлағанына анасы К. жүгіріп кіріп қызына араша түседі. Жәбірленуші К.-ны қазаға ұшырату қылмыстық ойы туындаған А. М.-ң үстінен тұрып, К.-ң оң жақ арқасынан бір рет соққы салған. Сөйтіп, К. жатын бөлмеден қашып шығып, аулада жұмыс жасап жүрген жолдасы У.-ы көмекке шақырған. К-ң бөлмеден шығып кеткенін пайдаланып А. жәбірленуші М.-ң сол жақ көкірегі тұсынан бір рет пышақпен соққы салған. Осы кезде даладан У. жүгіріп кіріп,

А.-ң басынан қолындағы күрекпен  екі рет ұрған. Басынан алған соққыдан А. есінен танып, екі адамды қасақана қазаға ұшырату ойын өзіне байланысты емес мән-жайлар бойынша ақырына дейін жеткізе алмаған.

Соттың үкімімен А. ҚР ҚК-ның 24-бабының 3-бөлігі – 99-бабының 1-бөлігі 1 тармағымен кінәлі деп танылып, оған 15 (он бес) жылға бас бостандығынан айыру жазасы тағайындалды.             

Үкім заңды күшіне енген жоқ.

                                                    

Қайнар: Жамбыл облысы бойынша қылмыстық істер жөніндегі мамандандырылған ауданаралық сотының баспасөз қызметі